Minn hugarheimur

Enn eitt dæmið um löglegt en siðlaust....

Það svíður undan þeirri aðför sem farin er að Ríkisútvarpi allra landsmanna þessa dagana. Og að nútímanum, samfélaginu sem við búum í ...Ég óska eftir umpólun á Alþingi allra landsmanna og það strax í dag. Taka verður á málefnum Rúv hið snarasta. Pólitískt skipað útvarpsráð er orðin alger tímaskekkja, hefur margsannað tilgangsleysi sitt og það er ekki horfandi upp á það lengur hvernig tíma og fjármunum hins almenna borgara er sóað þar. Ég er afskaplega ósátt við hlutverk þess og í raun vinnubrögð ráðsins líka. Ég spyr: Hvernig í ósköpunum komst meirihluti útvarpsráðs að sinni niðurstöðu? Og af hverju í ósköpunum sitja menn hjá í eins mikilvægri stöðuveitingu sem þessari? Rök beggja aðila, þ.e. meirihluta og minnihluta, standa engan veginn, virka kannski sem afsakanir en ekki rök. Pólitískt skipaður útvarpsstjóri til eilífðar er einnig tímaskekkja og ég hvet Markús Örn Antonsson til að segja af sér hið fyrsta. Ekki eingöngu vegna þessa máls en að sitja í stöðu sem þessari, í hvað eru þetta 14 ár, er forkastanlegt. Hann hefur 3 sinnum verið settur í þessa stöðu en staðan er í hvert sinn sett til 5 ára. Það er engum til góða að sitja í sama farinu svo lengi og ég hvet Markús til að finna menntun sinni og reynslu annan farveg þjóðinni og honum sjálfum til heilla. Ég er hjartanlega sammála Jóhanni Haukssyni um að í þessu máli hafa allir tapað. Allir þeir stjórnmálaflokkar sem þarna koma að málum, allir umsækjendur, útvarpsstjóri, Ríkisútvarpið sem koncept og sem vinnustaður og öll íslenska þjóðin hafa tapað. Það kemur enginn sterkur út úr þessu máli, máli sem ætti að vera lítið mál. Mannaráðningar!! Mig langar til að hvetja þá sem bera ábyrgð á þessu, þá bæði ríkistjórn okkar, útvarpsráð og þá sérstaklega útvarpsstjóra, að axla þessa ábyrgð heiðarlega, viðurkenna mistök sín og svona kannski í leiðinni setjast aftur á skólabekk og kynna sér nútíma stjórnunarhætti, starfsmannstjórnun og lýðræðisleg vinnubrögð.

posted by Erla S. Ragnarsdóttir @ 6:30 AM